Franz Kälin

NEKROLOG

Am 24. Januar 1943 isch dä Franz alls erschts Chind vom Franz und dä Hermine Kälin-Camenzind uf d’Wält chou. Mitem Wisi 1944, am Werner 1946, am Meiri 1948, am Viktor 1951 und dä Rosmarie 1957 isch dä d’Familie komplett gsi. Sini Schuel und Jugendjahr hed är im Birch-li verbrungä. Mit sinä Brüederä und dä anderä Birchlibuebe hend si mängä Streich usgheckt, wo d’Muetter nid immer erfreut hed. Nach dä Schuelzit isch är uf verschiedenä Buurästellä gsi, under anderem im Kloster Fahr.

Nachdem dä Vater mängs Jahr im Kloster Einsiedlä als Melker tätig gsi isch, hed är dank äm Franz und am Wisi s’Chlosterheimä Rossmatt im Jahr 1960 chönnä als Werkmeister übernä. Für diä grouss Familie isch das ä Sägä gsi. Äs ganzes Hus für sie ällei und derzuä ä groussä Gmüesgartä für d’Muetter. Mit vill Handarbeit und zwei Ross hend si d’Rossmatt bewirtschafted. Vor allem a denä zwei Ross hed dä Franz vill Freud gha. Är hed mit ihnä gfuerwärched und hed si ghegt und gflegt. I zwei Winter hed är d’Landwirtschaftsschuel absolviert.

Nacher isch är i dä Wintermonatä zerscht im Frauechloster und dänn bi dä Genossame Dorf-Binzen im Wald gah holzä, was ihm sehr zuegseit hed. Nachdem dä Wisi und dä Viktor 1974 d’Rossmatt i Pacht gnou hend, isch är dä ganzjährlich zu dä Binzner gah holzä.

Au Kameradschaft isch bim Franz nid z churz chou, mängs Jahr isch är zämä midem Werner im Alpenclub aktiv gsi. Au im Jodelclub Alpenrösli isch är vill Jahr Vorjodler gsi. S’Jodlä und Singä hed vo jung uf zum Franz ghört. Mit sinerä schöinä und klarä Stimm hed är mängisch binerä gselligä Rundi spontan äs Jodellied aagstummä und somit mängem Freud bereited.

Au hed dä Franz vill trurigs müessä erläbä. Im Jahr 1976 isch dä Wisi mit nur 32 Jahr gstorbä, im 1991 dä Vater, im 2004 dä Werner, im 2007 d’Muetter, im 2021 dä Viktor und im 2022 dä Meiri. Nach sinerä Pensionierig hed är äs nüs Hobby gfundä. Mehrmals i dä Wuche hed är midem Zug, sigs ällei oder mit Bekanntä, schöini Reis-li undernou.

Nachdem är i dä Langrüti ä Alterswohnig bezogä hed, isch är täglich mit Rucksack und Stäckä is Dorf gah postä oder isch i Friedhof oder i Bärgweid ufä gwandered. Diä Rundänä hend mängisch lang dured, hed doch dä Franz a jedem Eggä Bekannti aatroffä und hed mit allnä äs Schwätzli abghaltä.

2019 hed är ä schwäri Operation gha. Nach langem Spitalufenthalt und Reha hed sich dä Franz aber wieder guet erholt und är hed wieder chönnä sini Hobbys pflegä. Im Jahr 2024 hed sini Gsundhgeit rapid abgnah. Im März hed är müessä is Altersheim Langrüti züglä.

Är isch immer schwächer wordä und hed churz vor sim Tod nu ä schwärä Sturz gha, debi hed är sich ä Oberschenkelhalsbruch zuezogä. Wo si ihn im Spital Balgrist hend wellä operiere, hends gmerkt das är über Nacht ä Hirnschlag gha hed und die linki Sitä glähmt gsi isch. Am 17. Mai isch dä Franz im Spital Zollikerberg vo sinä Schmärzä erlöst wordä.

Liebä Franz, ruhe in Frieden.